पेटवूनी घरे आपुलीच चालले हे कुणाचे समर्थक
धुंदीत चालले घालीत आपुल्याच पावलास धाक
विकट हास्य करुनी नेते यांचे पाहती दुरुनी
वांझ करुनी वंशजांचा बदलती ललाटीचा लेख
जातियतेचे मद्य वाटले यांनी तरुण रक्तात
कालची पोरे आज लाविती आईच्या गळ्यास नख
वळूनी पुन्हा येऊनी यांनी मंदिरे पुन्हा भग्न केली
करण्यास अपशकून कापले जसे स्वत:चे नाक
नपुंसकता लपविण्या लाविले महापुरुषांचे टिळे
दिली भिरकाऊनी आसमंती क्रांतीविरांची राख....
